Euskal Herrian zehar 30 emanalditik gora egin ostean, Itsasoaren alaba Durangoko Azokan izango da, DVD polit gisa, Julen Gabiria idazlea, Antton Ezeiza zinegilea eta Alfonso Etxegarairen testu banarekin jantzitako liburuxkatxo batekin.
Berezia izango da, komertzioa egiteko gaiak ez direlakoan, azoka osoan prezioa ez daukan obra bakarra.
Izan ere, ez dugu kobratuko. Horren ordez, borondatea eskatuko dugu DVDaren truke, bakoitzak ahal duena eskaini diezagun.
Eta bildutako dirua, hurrengo filma egiteko erabiko dugu; Alfonso Etxegarai eta Kristiane Etxaluzi buruzko dokumentala.
Horregatik, zuen laguntza eskatzen dugu, bai eta informazio hau ahalik eta gehien zabaldu dezazuen.
Haize Goikoetxea:
Itsasoaren Alaba, oinarrian, nire behar sakon baten adierazpena zen. Aitaren bila egindako bidaia, ahanzturaren aurkako ariketa.
Aitzitik, dokumentala zabaltzeko erak, herriz herri eta auzoz auzo eramateak, Mikeli egindako bigarren omenaldi bihurtu du; Horregatik, zentzuzkoa da DVD hau, bere gorpua bezala, herriari eskaintzea.
DVD honek iraultza txiki bat, hausnarketa bat zabaldu nahi dizu: historia bat, samin eta irribarre bat, bizipen bat; baina komertziorik gabe. Itsasoaren Alaba eskaintzen dizugu eman nahi edo eman dezakezunaren truke. Zure borondateak ezarriko dio prezioa DVD honi. Prezioa baino balioa.
Zure laguntzarekin, gainera, filmea burutu duen lan-taldeak memoria ariketa gehiago proposatzea posible egingo duzu. Hurrengo dokumentala bidean dator, Kristiane Etxaluz eta Alfonso Etxegarai euskal borrokalarien historia. Udaberrirako prest izango dute.
Haizeren hitzak:Haize Goikoetxea Itsasoaren Alaba DVDa aurkezten
Mila esker.
